வவுனியா நகர சபையின் ஆளுகைக்குட்பட்ட குடியிருப்பு – வட்டாரம் 5 இற்கான நடமாடும் சேவை – 27.03.2024

வவுனியா நகர சபையின் 2024 ஆம் ஆண்டிற்கான இரண்டாவது நடமாடும் சேவையானது பூந்தோட்டம் சனசமூக நிலையத்தில் 27.03.2024 ஆம் திகதி புதன்கிழமை முற்பகல் 9.00 மணி தொடக்கம் பிற்பகல் 3.00 மணி வரை வவுனியா நகர சபையினால் வெற்றிகரமாக நடாத்தப்பட்டது. குறித்த நடமாடும் சேவையில் வவுனியா மாவட்டத்தின் பிராந்திய உள்ளூராட்சி உதவி ஆணையாளர், நகர சபையின் செயலாளர், உத்தியோகத்தர்கள், ஊழியர்கள் மற்றும் பொது மக்கள் என பலரும் பங்கேற்றிருந்தனர். குறித்த தினத்தில் நகர சபையினால் வீதி திருத்த வேலைகள், விளையாட்டு மைதான புனரமைப்பு வேலை, வீதி விளக்குகள் திருத்தம், வடிகாலமைப்பு சுத்திகரிப்பு வேலைகள், நீரிணைப்பு சேவைகள், கழிவற்றல் சேவைகள், சேதன பசளை விற்பனை, வியாபார உரிமம் வழங்குதல், முச்சக்கர வண்டி உரிமம் வழங்குதல், வீதி எல்லைக்கோட்டு சான்றிதழ் வழங்குதல், ஆதன பெயர் மாற்று சேவைகள், ஆதன வரியினை செலுத்துதல், விளம்பர அனுமதிகள், கட்டட அனுமதி வழங்குதல், காணி உப பிரிவிடுகை, நகர சபை பொது சுகாதார பரிசோதகர்களின் சுகாதார ஆலோசனைகள், நாய்ப்பட்டி வழங்குதல், நகர சபைக்கு உரித்தான முறைப்பாடுகளுக்கான தீர்வு வழங்குதல் உள்ளடங்கலாக அனைத்து சேவைகளும் நகர சபையினால் முன்னெடுக்கப்பட்டிருந்தது.
குறித்த தினத்தில் வருகை தந்த பொது மக்களின் வேண்டுகோளுக்கிணங்க, நகர சபையினால், பூந்தோட்டம் – பெரியார் குளம் வீதி திருத்த வேலை மற்றும் பூந்தோட்டம் மைதான புனரமைப்பு வேலைகள் முன்னெடுக்கப்பட்டிருந்தது. மேலும், வீதி விளக்குகளை திருத்தம் செய்வதற்கான கோரிக்கைகள் மக்களால் முன்வைக்கப்பட்டதற்கமைவாக, குறித்த தினத்திலேயே 10 வீதி விளக்குகள் திருத்தம் செய்யப்பட்டது.
மேலும் வீதி திருத்த வேலைகள் தொடர்பில், 06 கோரிக்கைகளும், வடிகாலமைப்பு துப்பரவு செய்தலுக்காக 06 கோரிக்கைகளும், குழாய்க்கிணறு திருத்தம் தொடர்பில் 01 கோரிக்கையும் மக்களிடமிருந்து கிடைக்கப்பெற்று தற்போது தொடர் நடவடிக்கை இடம்பெற்று வருகின்றது.
குறித்த நடமாடும் சேவையின் போது 4 கழிவகற்றல் வாகனங்கள் திண்ம கழிவகற்றல் செயற்பாட்டில் ஈடுபடுத்தப்பட்டதுடன், திண்ம கழிவகற்றல் தொடர்பில் 04 முறைப்பாடுகள் கிடைக்கப்பெற்று கழிவகற்றல் நடவடிக்கைகள் அன்றைய தினத்திலேயே முன்னெடுக்கப்பட்டிருந்தது. மேலும், விவசாய நடவடிக்கைகளுக்காக நகர சபையால் தயாரிக்கப்பட்ட 262 கிலோ சேதன பசளையானது குறைந்த விலைக்கு (ரூ.25.00 ) பொது மக்களுக்கு வழங்கப்பட்டிருந்தது.
மேலும், பொது மக்களிடமிருந்து 13 முறைப்பாடுகள் கிடைக்கப்பெற்றிருந்ததுடன், அனைத்து முறைப்பாடுகளும் அன்றைய தினமே செயலாளர் மற்றும் உத்தியோகத்தர்கள் ஆகியோரின் நேரடி கள விஜயத்தின் போது தீர்வு செய்யப்பட்டிருந்தது.
அத்துடன் குறித்த நடமாடும் சேவையில் கிடைக்கப்பெற்ற 22 வியாபார உரிமங்களுக்கான விண்ணப்பங்கள் அன்றைய தினமே பரிசீலிக்கப்பட்டு சான்றிதழ்கள் வழங்கப்பட்டிருந்ததுடன், நூலக சேவையினை விரிவாக்கும் நோக்கில் 13 நூலக அங்கத்துவ விண்ணப்பங்கள் பரசீலிக்கப்பட்டு விண்ணப்பதாரர்களுக்கு நூலக அங்கத்துவ அட்டைகளும் வழங்கி வைக்கப்பட்டது.
குறித்த நடமாடும் சேவை நிறைவின் போது 60 இற்கும் அதிகமான பொது மக்கள் வருகை தந்து நகர சபையின் சேவைகளை பெற்றிருந்தமை குறிப்பிடத்தக்கது. மக்களிடமிருந்து கிடைக்கப்பெற்றிருந்த பெரும்பான்மையான கோரிக்கைகள் அன்றைய தினமே பரிசீலிக்கப்பட்டு உரிய தீர்வுகள் வழங்கப்பட்டது.
மேலும், பூந்தோட்டம் சந்தியில் மக்களின் பொதுப்போக்குவரத்திற்கு இடையூறாக நிர்மாணிக்கப்பட்டிருந்த தற்காலிக கொட்டகையும் நகர சபையினால் அகற்றப்பட்டிருந்தது.
வவுனியா நகர சபையினால் முன்னெடுக்கப்பட்ட மக்களுக்கான இரண்டாவது நடமாடும் சேவையினை வெற்றிகரமாக நிறைவேற்றுவதற்கு எம்முடன் கைகோர்த்து நின்ற மக்கள் அனைவருக்கும் எமது மனமார்ந்த நன்றிகளை தெரிவித்துக்கொள்கின்றோம்.
எதிர்வரும் காலங்களிலும் இவ்வாறான நடமாடும் சேவைகள் ஏனைய வட்டாரங்களிலும் நடாத்தப்படவுள்ளது என்பதனை மகிழ்ச்சியுடன் அறியத்தருவதுடன், நகர சபையின் சேவைகளை திறன்பட வழங்குவதற்கு தங்கள் அனைவரினதும் ஒத்துழைப்பினையும், பங்களிப்பினையும் எதிர்பார்த்து நிற்கின்றோம்.

வவுனியா நகர சபையின் குடியிருப்பு வட்டாரத்திற்கான நடமாடும் சேவை – 27.03.2024

வவுனியா நகர சபையின் குடியிருப்பு வட்டாரத்திற்கான நடமாடும் சேவை – 27.03.2024
வவுனியா நகர சபையினால் வழங்கப்படும் அனைத்து சேவைகளையும் தங்கள் பிரதேசங்களுக்கே வருகை தந்து வழங்கும் நோக்கில் குடியிருப்பு வட்டார மக்களுக்கான நடமாடும் சேவையானது ஒழுங்கமைக்கப்பட்டுள்ளது. வவுனியா நகர சபையின் இரண்டாவது இந்நடமாடும் சேவையானது வவுனியா நகர சபையின் ஆளுகைக்குட்பட்ட குடியிருப்பு வட்டாரத்தில் அமைந்துள்ள பூந்தோட்டம் சன சமூக நிலையத்தில் 27.03.2024 ஆம் திகதி புதன்கிழமை முற்பகல் 9.00 மணி தொடக்கம் பிற்பகல் 3.00 மணி வரை நடாத்தப்படவுள்ளது.
இந்நடமாடும் சேவையில் வவுனியா நகர சபையினால் பின்வரும் அனைத்து விதமான சேவைகளும் வழங்கப்படவுள்ளன.
1. ஆதன வரி செலுத்த கூடிய வசதிகள்
2. ஆதன பெயர் மாற்ற சேவைகள்
3. கட்டட அனுமதி வழங்குதல்
4. காணி உப பிரிவிடுகை மற்றும் சேர்ப்பு சேவைகள்
5. வீதி எல்லைக்கோட்டு சான்றிதழ் வழங்குதல்
6. வியாபார உரிமம் வழங்குதல்
7. விளம்பர பலகைகளுக்கான அனுமதி வழங்குதல்
8. துவிச்சக்கர வண்டிகளுக்கான உரிமம் (இலக்க தகடு) வழங்குதல்.
9. முச்சக்கர வண்டிகளுக்கான உரிமம் வழங்குதல்
10. வீதி விளக்குகள் திருத்தம்
11. நகர சபைக்கு சொந்தமான வீதிகள் திருத்தம்
12. நீர் இணைப்பு பெறுவதற்கான அனுமதி வழங்குதல்
13. நகர சபைக்கு சொந்தமான வடிகால்கள் சுத்திகரிப்பு
14. நூலக அங்கத்துவ சேவைகள்
15. கழிவகற்றல் சேவைகள்
16. சேதன பசளை விற்பனை
17. மீள் சுழற்சி கழிவு பொருட்கள் கொள்வனவு
18. நகர சபைக்கு உரித்தான முறைப்பாடுகளுக்கான தீர்வு வழங்குதல்.
19. நகர சபை பொது சுகாதார பரிசோதகர்களின் ஆலோசனை சேவைகள்
20. வளர்ப்பு நாய்களுக்கான நாய்ப்பட்டி வழங்குதல்.
குறித்த தினத்தில் எமது சேவைகளை பெற்றுக்கொள்ள தயாராகுமாறு அன்புடன் கேட்டுக்கொள்வதுடன், இது வரை ஆதன வரியினை செலுத்தாதோர் ஆதன வரியினை முழுமையாக செலுத்தி விலை கழிவுகளை பெற்றுக்கொள்ளுமாறும், தங்களது வட்டார அபிவிருத்திக்கு முழுமையான பங்களிப்பினை வழங்கி இந்நடமாடும் சேவையினை வெற்றிகரமாக முன்னெடுப்பதற்கு தங்கள் ஒத்துழைப்பினை வழங்கியுதவுமாறும் அன்புடன் கேட்டுக்கொள்கின்றோம்.

வவுனியா நகர சபையின் திண்மக்கழிவுகள் சேகரிப்பு நிலையம் திறப்பு – 12.03.2024

வவுனியா நகர சபையினால் இன்றைய தினம் 12.03.2024 ஆம் திகதி வவுனியா ஹொரவப்பொத்தான வீதியில் மரக்கறி விற்பனை சந்தைக்கு முன்பாக திண்ம கழிவுகள் சேகரிப்பு நிலையம் திறந்து வைக்கப்பட்டது. நகர சபையின் செயலாளர் திரு.இராசையா தயாபரன் அவர்களின் தலைமையில் நடைபெற்ற குறித்த நிகழ்வில் பிரதம விருந்தினராக வவுனியா மாவட்ட அரசாங்க அதிபர் திரு.பி.ஏ.சரத்சந்திர அவர்களும், சிறப்பு விருந்தினர்களாக வவுனியா மாவட்ட மேலதிக அரசாங்க அதிபர் திரு.த.திரேஸ்குமார், வவுனியா பிராந்திய சுகாதார சேவைகள் பணிப்பாளர் Dr.எம்.மகேந்திரன், வவுனியா பிராந்திய உள்ளூராட்சி உதவி ஆணையாளர் திரு.தெ.ரதீஸ்வரன், வவுனியா சுகாதார வைத்திய அதிகாரி Dr.வ.சுரேந்திரன், வெங்கலச்செட்டிக்குளம் பிரதேச சபையின் செயலாளர் திரு.எஸ்.கிருபாகரன், நகர சபை அலுவலர்கள், பொது மக்கள் என பலரும் கலந்து சிறப்பித்தனர். குறித்த திண்மக்கழிவுகள் சேகரிப்பு நிலையமானது அரசாங்க அதிபர் திரு.பி.ஏ.சரத்சந்திர அவர்களால் திறந்து வைக்கப்பட்டது. குறித்த திண்மக்கழிவுகள் சேகரிப்பு நிலையமானது வாரத்தின் ஏழு நாட்களும் மு.ப 6.00 மணி தொடக்கம் பி.ப 6.00 மணி வரை திறந்திருக்கும் என்பதனை அறியத்தருவதோடு, பொது மக்கள் திண்மக்கழிவுகளை குறித்த நிலையத்தில் ஒப்படைக்கலாம் என்பதனையும் மகிழ்ச்சியுடன் அறியத்தருகின்றோம்.

சர்வதேச மகளிர் தினமும் – பெண்ணியம் நூற்கண்காட்சியும்

வவுனியா நகரசபை பொது நூலகத்தினால் சர்வதேச மகளிர் தினத்தை முன்னிட்டு (08.03.2024) இன்று 07.03.2024 வ/சைவபிரகாச மகளிர் கல்லூரி உயர்தர மாணவர்களிற்கு இலவச நூலக அங்கத்துவமும். பெண்ணியம் தொடர்பான நூல்கள் அறிமுக கண்காட்சியும் இடம்பெற்றது. இந்நிகழ்வினை நடத்துவதற்கு ஊக்கமளித்த சபையின் செயலாளர் அவர்களிற்கும். ஒழுங்கு படுத்தி வழங்கிய பாடசாலை அதிபர், பிரதி அதிபர் , நூலக பொறுப்பாசிரியர்கள், ஆசிரியர்கள் அனைவருக்கும் நன்றிகளை தெரிவிப்பதோடு. மற்றும் கலந்து சிறப்பித்து ஆர்வத்தோடு இலவச அங்கத்துவங்களைபெற்று (61) அதன் பயன்பாடு பற்றிய விளக்கங்களை தெளிவுடன் கேட்டு அக்கறையோடு நடந்துகொண்ட மாணவர்களையும் வாழ்த்துவதோடு. இதன் பயன் மேலும் நடமாடும் சேவைகளை நடாத்த தூண்டும் வகையில் மிகச் சிறந்த தருணமாக அமையப் பெற்றமை மகிழ்வளிக்கின்றது.

வவுனியா நகர் பகுதிகளில் போக்குவரத்து நெரிசலை கட்டுப்படுத்துவது தொடர்பான கலந்துரையாடல்

வவுனியா நகர் பகுதிகளில் பொதுமக்களின் போக்குவரத்து நெரிசலை கட்டுப்படுத்துவது தொடர்பான கலந்துரையாடல் இன்று 07.03.2024 ஆம் திகதி பி.ப 3.00 மணியளவில் வவுனியா நகர சபை மண்டபத்தில் நகரசபை செயலாளர் திரு. இராசையா தயாபரன் தலைமையில் நடைபெற்றது. குறித்த கலந்துரையாடலில் வவுனியா பொலிஸ் திணைக்கள போக்குவரத்து பிரிவு பொறுப்பதிகாரி , வவுனியா வர்த்தக சங்க தலைவர் திரு. எஸ்.சுஜன், வர்த்தக சங்க செயலாளர் திரு. ஆ.அம்பிகைபாகன் உட்பட்ட வர்த்தக சங்க பிரதிநிதிகள், நகரசபை உத்தியோகத்தர்கள் ஆகியோர் கலந்துகொண்டனர்.
குறித்த கலந்துரையாடலில் வவுனியா நகர பகுதிகளில் பொதுமக்களின் போக்குவரத்து நெரிசலைக் கட்டுப்படுத்துவது தொடர்பாக கலந்துரையாடப்பட்டதுடன் , பின்வரும் தீர்மானங்கள் எடுக்கப்பட்டது .
01. பசார் வீதி, தர்மலிங்கம் வீதி, ஹொரவப்பொத்தான வீதி ஆகிய வீதிகளில் உள்ள கடைகளில் வேலை செய்பவர்களின் வாகனங்களை பொலிஸ் நிலையத்திற்கு முன்பாக உள்ள நகரசபை வாகன தரிப்பிடத்தில் நிறுத்த வர்த்தக சங்கம் நடவடிக்கை எடுத்தல்.
02.தர்மலிங்கம் வீதியின் பக்க எல்லைக்கோடுகளை நகரசபை அமைப்பதுடன், குறித்த எல்லைக்கோட்டுக்கு வெளியே தரித்துவிடப்படும் வாகனங்களுக்கு போக்குவரத்து பொலிஸ் அலுவலர்கள் நடவடிக்கை எடுத்தல்.
03.நகரசபையால் ஒரு வழிப்பாதையாக ஏற்கனவே பிரகடனப்படுத்தப்பட்டுள்ள சந்தைசுற்றுவட்ட வீதியில் ( சதோசா வீதி) போக்குவரத்துப் பொலிஸ் அலுவலர்களின் கண்காணிப்பை அதிகரித்தல் .
மேற்படி தீர்மானங்களை 15.03.2024 ஆம் திகதி முதல் அமுல்படுத்துவது எனவும் தீர்மானிக்கப்பட்டது.

வவுனியா நகர சபைக்கான இணையத்தளம் அங்குரார்ப்பண நிகழ்வு

UNDP அமைப்பின் CDLG திட்டத்தின் அனுசரணையுடன் வடிவமைக்கப்பட்ட வடக்கு மாகாணத்தின் 34 உள்ளூராட்சி மன்றங்களுக்கான இணையத்தளங்கள் நேற்றைய தினம் 01.03.2024 ஆம் திகதி காலை 10.00 மணிக்கு பிரதம செயலாளர் அலுவலகத்தின் மாநாட்டு மண்டபத்தில் வட மாகாண உள்ளூராட்சி ஆணையாளர் தலைமையில் இடம்பெற்றது.
இந்நிகழ்வில் 34 உள்ளூராட்சி மன்றங்களுக்குமான இணையத்தளங்கள் வட மாகாண கௌரவ ஆளுநர் திருமதி.பி.எஸ்.எம்.சார்ள்ஸ் அவர்களினால் உத்தியோக பூர்வமாக அங்குரார்ப்பணம் செய்து வைக்கப்பட்டது. இதனை தொடர்ந்து, இவ் இணையத்தளத்தினை சிறப்புற வடிவமைத்த உத்தியோகத்தர்கள் பிரதம செயலாளர் அவர்களால் மெச்சுரை வழங்கி கௌரவிக்கப்பட்டனர்.
இவ் அங்குரார்ப்பண நிகழ்வில் வடக்கு மாகாணத்தின் பிரதம செயலாளர்,உள்ளூராட்சி அமைச்சின் செயலாளர்,வட மாகாணத்தின் உள்ளூராட்சி உதவி ஆணையாளர்கள், சபையின் செயலாளர்கள், UNDP நிறுவனத்தின் பிரதிநிதிகள் என பலரும் கலந்து கொண்டிருந்தமை குறிப்பிடத்தக்கது. அந்த வகையில் வவுனியா நகர சபைக்குரிய www.vavuniya.uc.gov.lk
எனும் இற்றைப்படுத்தப்பட்ட இணையத்தளமானது நேற்றைய தினம் அங்குரார்ப்பணம் செய்யப்பட்டது. எமது சபைக்கான இணையத்தளத்தினை எமது சபையின் உத்தியோகத்தர்களாகிய திரு.த.பிருந்தாபன் மற்றும் செல்வி .ப.தயாழினி ஆகியோர் வடிவமைத்திருந்தமை குறிப்பிடத்தக்கது. குறித்த இணையத்தளம் ஊடாக, பொது மக்கள் நகர சபையின் சேவைகள் தொடர்பில் முழுமையான தகவல்களை பெற்றுக்கொள்ள முடியும் என்பதனை மகிழ்ச்சியுடன் அறியத்தருகின்றோம்.எதிர்வரும் காலங்களில் குறித்த இணையத்தளம் ஊடாக நகர சபைக்குரிய அனைத்து சேவைகளையும் மக்கள் பெற்றுக்கொள்ளக்கூடியவாறாக, இதனை முழுமைப்படுத்தும் நடவடிக்கைகள் தற்போது இடம்பெற்று வருகின்றது.அந்த வகையில் இவ் இணையத்தள வடிவமைப்பிற்கு அனுசரனை வழங்கிய CDLG திட்டக்குழுவினருக்கும் இதனை வெற்றிகரமாக வடிவமைத்த எமது சபையின் உத்தியோகத்தர்களுக்கும் எமது மனமார்ந்த நன்றிகள்.

வவுனியா நகர சபையின் ஆளுகைக்குட்பட்ட தாண்டிக்குளம் – வட்டாரம் 1 இற்கான நடமாடும் சேவை – 29.02.2024

2024 ஆம் ஆண்டின் வவுனியா நகர சபையின் ஆளுகைக்குட்பட்ட தாண்டிக்குளம் வட்டாரத்திற்கான நடமாடும் சேவையானது மக்களுக்கு அறியத்தந்தமையின் பிரகாரம், திருநாவற்குளம் பொதுநோக்கு மண்டபத்தில் 29.02.2024 ஆம் திகதி வியாழக்கிழமை முற்பகல் 9.00 மணி தொடக்கம் பிற்பகல் 3.00 மணி வரை வவுனியா நகர சபையினால் வெற்றிகரமாக நடாத்தப்பட்டது.
குறித்த நடமாடும் சேவையில் வவுனியா மாவட்டத்தின் பிராந்திய உள்ளூராட்சி உதவி ஆணையாளர், நகர சபையின் செயலாளர், உத்தியோகத்தர்கள், ஊழியர்கள் மற்றும் பொது மக்கள் என பலரும் பங்கேற்றிருந்தனர். குறித்த தினத்தில் நகர சபையினால் வீதி திருத்த வேலைகள், வீதி விளக்குகள் திருத்தம், வடிகாலமைப்பு சுத்திகரிப்பு வேலைகள், நீரிணைப்பு சேவைகள், கழிவற்றல் சேவைகள், சேதன பசளை விற்பனை, வியாபார உரிமம் வழங்குதல், முச்சக்கர வண்டி உரிமம் வழங்குதல், வீதி எல்லைக்கோட்டு சான்றிதழ் வழங்குதல், ஆதன பெயர் மாற்று சேவைகள், ஆதன வரியினை செலுத்துதல், விளம்பர அனுமதிகள், கட்டட அனுமதி வழங்குதல், காணி உப பிரிவிடுகை, நகர சபை பொது சுகாதார பரிசோதகர்களின் சுகாதார ஆலோசனைகள், நகர சபைக்கு உரித்தான முறைப்பாடுகளுக்கான தீர்வு வழங்குதல் உள்ளடங்கலாக அனைத்து சேவைகளும் நகர சபையினால் முன்னெடுக்கப்பட்டிருந்தது.
குறித்த தினத்தில் வருகை தந்த பொது மக்களின் வேண்டுகோளுக்கிணங்க, நகர சபையினால், நாக தம்பிரான் கோவில் வீதி மற்றும் ஐயனார் கோவில் வீதி திருத்த வேலைகள் முன்னெடுக்கப்பட்டிருந்தது. மேலும், 30 வீதி விளக்குகளை திருத்தம் செய்வதற்கான கோரிக்கைகள் மக்களால் முன்வைக்கப்பட்டதற்கமைவாக, குறித்த தினத்திலேயே 28 வீதி விளக்குகள் திருத்தம் செய்யப்பட்டதுடன், 2 வீதி விளக்குகளை திருத்தம் செய்வதற்கான நடவடிக்கைகள் எடுக்கப்பட்டுள்ளது.
குறித்த நடமாடும் சேவையின் போது 5 கழிவகற்றல் வாகனங்கள் திண்ம கழிவகற்றல் செயற்பாட்டில் ஈடுபடுத்தப்பட்டதுடன், திண்ம கழிவகற்றல் தொடர்பில் 11 முறைப்பாடுகள் கிடைக்கப்பெற்று கழிவகற்றல் நடவடிக்கைகள் அன்றைய தினத்திலேயே முன்னெடுக்கப்பட்டிருந்தது. மேலும், விவசாய நடவடிக்கைகளுக்காக நகர சபையால் தயாரிக்கப்பட்ட 280 கிலோ சேதன பசளையானது குறைந்த விலைக்கு (ரூ.25.00 ) பொது மக்களுக்கு வழங்கப்பட்டிருந்தது.
மேலும், பொது மக்களிடமிருந்து 24 முறைப்பாடுகள் கிடைக்கப்பெற்றிருந்ததுடன், 22 முறைப்பாடுகள் அன்றைய தினமே பிராந்திய உள்ளூராட்சி உதவி ஆணையாளர், செயலாளர் மற்றும் உத்தியோகத்தர்கள் ஆகியோர் நேரடி கள விஜயம் மேற்கொண்டு தீர்வு காணப்பட்டதுடன், 02 முறைப்பாடுகள் தற்போது அலுவலக பரிசீலனையிலுள்ளது. அத்துடன் குறித்த நடமாடும் சேவையில் கிடைக்கப்பெற்ற 35 வியாபார உரிமங்களுக்கான விண்ணப்பங்கள் அன்றைய தினமே பரிசீலிக்கப்பட்டு சான்றிதழ்கள் வழங்கப்பட்டிருந்ததுடன், நூலக சேவையினை விரிவாக்கும் நோக்கில் 25 நூலக அங்கத்துவ விண்ணப்பங்கள் பரசீலிக்கப்பட்டு விண்ணப்பதாரர்களுக்கு நூலக அங்கத்துவ அட்டைகளும் வழங்கி வைக்கப்பட்டது.
குறித்த நடமாடும் சேவை நிறைவின் போது 110 இற்கும் அதிகமான பொது மக்கள் வருகை தந்து நகர சபையின் சேவைகளை பெற்றிருந்தமை குறிப்பிடத்தக்கது. மக்களிடமிருந்து கிடைக்கப்பெற்றிருந்த பெரும்பான்மையான கோரிக்கைகள் அன்றைய தினமே பரிசீலிக்கப்பட்டு உரிய தீர்வுகள் வழங்கப்பட்டது.
வவுனியா நகர சபையினால் முன்னெடுக்கப்பட்ட மக்களுக்கான முதலாவது நடமாடும் சேவையினை வெற்றிகரமாக நிறைவேற்றுவதற்கு எம்முடன் கைகோர்த்து நின்ற மக்கள் அனைவருக்கும் எமது மனமார்ந்த நன்றிகளை தெரிவித்துக்கொள்கின்றோம். எதிர்வரும் காலங்களிலும் இவ்வாறான நடமாடும் சேவைகள் ஏனைய வட்டாரங்களிலும் நடாத்தப்படவுள்ளது என்பதனை மகிழ்ச்சியுடன் அறியத்தருவதுடன், நகர சபையின் சேவைகளை திறன்பட வழங்குவதற்கு தங்கள் அனைவரினதும் ஒத்துழைப்பினையும், பங்களிப்பினையும் எதிர்பார்த்து நிற்கின்றோம்.
Translate »